WWW.TUNGZANGNEWS.COM

 
Abeisa 1988 kum akipan Kawlgam ah galkap kumpi Bo Nee Win makai-in thatang zawhthawn thu (Thau muk) tawh Kawlgam hong ukcip uh ciangin, Kawlgam bup Sangnaupang (Siamsinte) makai in, mipite tawh kikop in, galkap kumpi tawh sisan naisan luangin, kidona le buaina lianpi piang hi. Tua buaina hong veen/ khawl khit 1990 kum ciangin kiteelna lianpi kinei a, Daw Aung San Suh Kyi i makaih NLD Party in 90% tawh gualzawhna ngah hi. A hi zongin galkap Kumpi in NLD tungah thuneihna (Authority) pia nuam tuanlo uh ahih manin, NLD te akipan Mualmi party khempeuh le Siamsin sangnaupangte lungkimlo in, lampi tuamtuam tawh Galkap kumpi langpang dingin Thau tawi in gamnuai ah phualsat ciat uh hi.

Tua banga gamnuai beel Mualmi Thautawite sungah ZNC Party pan MP khat ahi Pu Thang Lian Pau Guite makai in abeisa 1993 kumin Zomi Re-unification Organization (ZRO) cih min phuakin Manipur (India) gamah phualsat hi. ZRO i vaihawmna nuai ah Zomi Revolutionary Army (ZRA) ci-in, Thau vui thautang tawh gam le minam ading nasiatak panlakna nei dingin kipankhia uh hi. ZRO i lungphut bulpipen in Kawlgam le vaigam a om Zomi namte kigawmkhawm in, minam kician le gam kician khat neihzawhna ding banah ei le ei suaktatak kivaipuak theihna dng cihte lungtuppi in nei uh hi. Kawlgam lam pan Tuailai Siamsinte le India, Manipur pan Tuailaite kikaikhawm in, minam ading guahzu daikai nuai ah a nuntakna uh khaamin mapang bek tham loin, nuntakna a piakhia Salpha tampi om khinta hi.

ZRO pen Manipur, India gam pansan ahi mah bangin, ngimna zah le haksatna tuamtuam hangin, Kawlgam sung lam tam lutthei lo uh hi. Ahi zongin Manipur lam Zomite ading lungmuanna le daihna a om theihna dingin tuni dong gam le nam kemin dal uh hi. Hih bangin Zomi galkap kipawlna i neih theih manin, sim le maal, suah le tum a om Zomite angtang mahmah uh hi. Pasian huhna tawh ZRO /ZRA in mainawt toto zelin, tu in India gam bek hi nawn loin,Kawlgam sunga om Thau tawi Mualmite khempeuh Kipawlna (UNFC) tawh mapang khawm nuam uh ahih manin,Kawlgam le Thailand gamgi mun khatah ZRO zumkhen (ZRO Eastern Comman) kipanthei ta cih kiza hi.

Tulaitak Kawlgam dinmun pen Thein Sein kumpi in NLD party le Mualmi partyte akipan Mualmi Thau tawi kipawlnate khempeuh Kipawlna (NUFC)te tawh galkilemna nasiatak a bawlbawl laitak uh ah hi. Tua ahih manin, ZRO/ZRA in zong Kawlgam ah kilemna omna ding le Zogam le Zomite in gam le lei kician neih mengmengna ding lunggulhna lianpi nei semsem uh ahihna hangin, Kawlgam kumpi tawh kimeltheihna / kilemna bawl theihna ding lunggulhna nei uh cih kiza hi. ZRO/ZRA i tangthu tom le zumkhen vai Thupulakna (Statement) zong Kawllai tawh bawl khia ta uh a, a kithuah (Attachment) sungah kisimthei ding hi. Tua banahZRO/ZRA i zumkhen vai le kalsuanzia a lunglutte in Email:zroeastern@gmail.com,zolandgroup@gmail.comah kidongthei thu cih kiza hi.

Ref: ZRO Statement (Eastern Office) & Pu Kingmang

 


Comments




Leave a Reply