WWW.TUNGZANGNEWS.COM

 
Gam khangto te ah electric zangin an kihuan mah taleh tuciang dongin Zogam ah singkhuah mah kizangin Thuk tungah an le tui kihuan lai dinmun tawh i khuasa hi. Singkhuah tawh an ihuan theihna dingin Thuk kisam hamtang hi. Thuk in khuam/khe 3 nei hamtang hi. Khe khat bek anei Thuk om ngeilo hi. Khe khat le nih bek tawh Thuk ding theilo a, khe thum pan atungsiah bek tawh Thuk dingtang theibek hi.

Tua mah bangin mihing nuntakna ah zong, leitung ah kiptak a idinkip zawh nadingin dinmun thum kalkak in kalsuan kul a, tua dinmun thum pen gawmkhawm thei a nuntak pihna in alawhcing khuasakzia hong piangsak hi. Ei Zomi sungah dinmun khat bek kalkak ihih manin, i khuasak zia ah kiptak zolo in hoizel pukzel sawizel cih bangin ki om hi. Dinmun thum in nek zonna, gam-le-nam leh Biakna cihte ahihi.

1. Nek Zonna:

Minam-le-gam vai leh Biakna vai tawh kisai kilkel lo in nek zonna sum khuambul ineih loh manin, Zomite khantohna ah ki tuantual mahmah a, namdangte kiban zolo hi. Minam nasem ihi-a, Biakna nasem ihi zongin nek zonna sum khuambul pen atuam in neihkul hi. Cih nopna ah Pasian nasem khat in Pawlpi sung pan kipia khasum leh love give bek ngak in anuntak pen Pawlpi sila tawh kibang a, nasepna tangzai hetlo hi.

2. Gam le Nam:

Mihing khat a ipian nak leh gam le minam kician neih kul hi. Gam makai ihi-a, minam makai ihi zongin,nek zonna sum khuambul pen ei-le-ei in neihzawh ding kisam hi. Kumpi sunga khasum bek ingak tak ciangin kumpi sila kisuak a, nasepna tangzai theilo hi. Minam vaibel gen navet omlo hi. Tulaitak i theihtek minam kipawlna ahi, ZCD Party, GZA, LZI, WZC leh Zomi kipawlna tuamtuam ah makai ten khasum asang uhhiam?

3. Biakna:

Leitungah mihing khat a piang mikhat in biakna kiplet khat neihloh phamawh hi. Biakna sungah makai te haksatna bulpi pen in sum khuambul ahihi. Pasian nasem ten sum khuambul neilo in, Pawlpi sung pan kizek khasum le love give bek hong nuntak pih tak uh ciangin, tua budget in innkuan khat nuntakna piangsak zolo hi. A tuam in sum khuambul neih zawh ding akisapna hih mun ah kilang khia hi.

Kup Nawina:

Sum khuambup i cih ciangin khasum agen ihi kei a, ei leh ei-a dinzawhna sumlut (income) agen nuam ihihi. Kumpi nasem, Biakna nasem leh minam le gam nasem tenzong amau leh amau nuntak khop piangsakzo sum khuambul neih kul a, kumpi sung pan kingah khasum bek ngak ding hilo hi. Khasum bek ingak ciangin eibek zattawm dingzong kicinglo ahih manin, i nasepzia tangzai thei vetlo hi.

Gentehna in, Bishop Felix Lian Khen Thang pen full time a biakna nasem ahih manin, biakna sungtawh kisai vetlo investment khat Ansai or Niangtui sai cihbang bawlzo hileh biakna sunga kiciangtan budget zat kullo in, minam adingin apilna bek hilo in, aneihsa tawh zong ma hongpang zo dinghi. Gentehna-a i genpak hilel hi. Tel ciat ni maw.

Gentehna in, Dr. Hau Za Cin bangin Singapore Dollor 24,ooo bang khasum sang hi. Khasum bek asih dongin neksawm ding hilo a, apualam ah investment khatpeuh atuam a bawltheih ding kisam hi. Nasepna pan khawl dingin Business kipan ding cihna hilo zaw in, anasep kawmkawm mah in apualam ah private business khat neih zawh kul hi.

Gentehna in, Evan. Lang Do Khup bang enlehang Pasian nasem khat mah ahihi. Tua kawm mah in financial Service ahi, Video Cameraman, Editing Video leh Music Studio service cih bangte nasep in nei ahih manin, Biakna nasem ahih zenzen hangin, private income kician pen ama adingin sum khuambul aneizo khat hongsuak hi.

Thu Khupna:

Nek zonna ngiat Business bek nuntak pih a nasem ngiatngiat tenzong, i ngah sum pen tags piak tangtang ding kisam hi. Goverment tags apiak kul mah bangin, minam kipawlna leh biakna pawlpi ah tags manman in piak kul hi. Biakna kipawlna leh minam kipawlna ah milip in tags dik tak ipiak zawh ciangin, kipawlna inzong sum khuambul tawphah in na hong semzo pan ding ahihi.

Tua ahih manin, nek zonna, gam le nam leh biakna cih thuthum pen khethum nei Thuk mah tawh akibang hi a, tua teng kalkak a nuntak ding ahihi. Minam kipawlna hong picin nadingin tangpi tangta in tags manman in ipiak zawh ding kisam a, Biakna pawlpi kimakaih zia alawhcin theih nadingin zong tangpi tangta mah in 10% mantak in piak kul hi. Aneu pen pan alian pen dongin ma pankhop ding kisam hi.

Dal Sian Hung
 


Comments

Lianno
05/08/2014 17:45

Hoih manmah ei Hungpi hongsungzel ou hih bang thute!

Reply



Leave a Reply