WWW.TUNGZANGNEWS.COM

 
Minam Itna Zawi Man

Minam ahihkeileh gam khat-a ateengkhawm milip' dinmun suutna-ah bangbang ahitazong-in akhangkhin gamliante' thuluan paizia tuamtuamte-mah lungsimpia thei-a, lungluut bek hilo-in, tua thuluan paiziate mah-tawh I-kalsuan theih mateng minam akhangto ngeilo, ngeiloding ahihi. Gentehna-in, "Ko ka' khuavuah ??? cilel hive-ung, nang-tawh bang kisai., " cihbangte-a kipan adoptive ngiatlohna, sawmlohna, awlmawhlohna cihte-pen minam, tualsung leh kipawlna tuamtuamte' bincipna, kihukcipna leh haicipna ahihi.

True ignorance is not the absence of knowledge, but the refusal to acquire it."


Hih kammal thupi-hi. Zomi ataangpi-pen apillo hilo, akitheihmawhbawl hizaw-a, apil hilo, akipilsak hizaw-hi. Tua kawmkaal-ah "beh, meeltheih, naaihuai, khua, khawk/kuam cbt"-tawh vaai akisaina leh thu akilaakna asiahuai zawkaanlaai ahihi. Asiapenpen-ah, mimal tung-ah kingakna ahihi. Thuguipi, thumaanthutak leh thuluan (theory) peuhmah ki-awlmawhlo, mi-khat athugen, alaaigelh zianeithu/ngaihsuttaak-hiam taklo-hiam, reasonability, objectivity, theoreticality, practicability, feasibility, rationality cbt-a kipan ngaihsut mahmah-in kinei lo-in amimal (thusung mi' zialehtong, mimal kizopna, lungkimna/lungkimlohna cbt) etna-tawh laai kithuk, pau kidawng, cihbang vive kimu-hi.
 
Zomite ataangpi mimal kizopna tung-ah kinga-a, thumaan leh zawinei thuguipite awlmawh-in akineihloh man-in tuni tanpha biaknalam hitaleh, tualsung kipawlnalam hitaleh minam kipawlna-a kipan kipawlna tuamtuam-ah thupaizia leh thuguiletpi-pen mimal tung-ah kinga-in thu tung-ah kingalo ahihman-in avaangpha kipawlna a-om theilo ahihi. Mimal tung bekbek-ah akingak ziak-in aziakzuui asia-mahmah "makaai uutna" kilawhtaak-hi. Taakcing (qualify) lopi-a makaai uutna-in minam hongluah ciang-in, atung-a pulaaksa mahbang-in mimal muiituum-in kinei pah-a, pawlpi' muiituum/ngiimna bulpi' sang-in pawlmi ahitheizah-in hong panpihding cihlam-ah kikalsuan pah-hi. Ngiimna/Tupna-tawh kizuui-a kalsuanna sang-in mimal khawina-tawh akikalsuan man-in kipawlna-pen kipawlna honghi nawnlo-in, kideidanna hongsuak-hi. Kideidanna pan-in kikhenna hongpiang-a, kideidanna ziak-a kikhenna-pen mimal kithulimlohna gah ahihman-in akikhen pawlte ki-el pah-hi. Ki-el ahihman-in aminpua-a pankhop nading mindeihna peuh-tawh kambek-tawh aki vaaihawmhawm hang-in a-omna ngeisa mah-ah omden lel-hi. 
 
Ka' neulaai-in ka' Pa-in Biakinn hunzatna-ah "gentehna taangthu tomno" hong gen-pen: 
 
"Mi-nih guunkuang-tawh zin ding-in kipan uhhi. Zaan thapaai guunkuang hotding ahihman-in kiginkholhna-in zu vadawn uhhi. Am philphel-in guunkuang tung-ah hongkahto uh-a, anihtuak-in 'khuavaak ma-in tun sawmni-ei' ci-in naakpi-in hot ziahziah uh-a, haanciam mahmah uhhi. Naak hot mahmah-uh ahihman-in guunkuang-zong kingawk ziahziah, amau-zong thangah mahmah, khua-ul ziat leh vei-ah kaaikeei. Khuavaak ciang-in akiim-uh a-etleh zaan nitaak-a akipatna phual-mah nana-hi mawk-hi. Hoihtak guunkuang aveel-uh ciang-in "guunkuang khihna khau phello-a ahot-hot" ahihlam-uh phawk uh-a, "hoihtak-a aveel masakloh-uh nasa mahmah kawm-in kitawpat kiikding hongsuak-hi."  Ka' Pa-in Pasian' thu ahzong ei' thangahna, kingawk ziahziah I-kisakna maanhiam khial-hiam kisittel nading agen ahihi. 
 
Kei' gennop-pen, Zomite khangto kisa mahmahgawp, thupha-zong angah mahmah kisagawppaat, ngam mahmah, gualbaan kisa mahmah, nasia kisa-mahmah saam vehang-in, I' thangahna, hi I' kisaknate, minam-zong it mahmah I' kisaknate, pilgawp-zong I' kisaknate, minei I' kisaknate, zai I' kisaknate-a kipan tulaai minam-sung tuihualpite entek taktakmah lehang azumhuai mahmah, atualniam mahmah, akihhuai mahmah, kiimlehpaam khuadaakloh-vaai mahmah ahihlam kimu thei-hi (minam gensiasia, minam itlo) hongci a-omleh lungdam-hi, banghanghiam cihleh mipihte' haina, tualniamna ameet la-a, mipihte amawk phatphat ka' hihloh naakpi-in angtang-in Pasian' Min ka-phat seemseem-hi. Mihai khat pumphatphat lecin tuami akhansung gualbaan ngeilo dinghi cih Greek lungngaihsiampite' muhna a-um kahihi. Zomite naakpi-in tualniam-a mimal tung-ah kinga timtem uhhi. "Ka' zuihpa' thuguilet banghiam?" cih nangawn theilo-in ami' ziak-in sihpihngam, pumpanpihna, luangkhamngam hontang ki-om-hi.
 
Hih-pen ataktak-in minam itna hilo-a, mimal angsung ahihi. Ei'n makaai tutphah ngahding ahihkeileh ei' meeltheih, ei' naaihuai, ei' tanau-in panmun ngahding cihna hi-a, thuguiletpi sung-ah bangkiguang cih nangawn kikancian ngeilo-hi. Ka' khua-ah, pute' hunlaai-in papi khat kap-a, anaupa-zong kahpih-hi. A' u-in, "Nang bangcia kapna?" acihleh, "ka' u' hehna keizong heh buangding kahihteh ci-a" ci-in dawng kici-hi. Thupi mahmah-tawh akibat hang-in thupi hetlo khat hi-a, tulaai Zomite tuabang vive hisimsim-hi. A' u a-it ahihleh a' u' kahna mawk kahpih zenzending hilo-in, "Banghang-a kap? Bangcihleng noptuam sakding? Bangci panpih theiding?" ci-in akahna aziak kanding, natna ahihleh anoptuam nading meek kuulmaw, zatui piak/nuh kuulmaw, siampite sap kuulmaw, khasiat ziak ahihleh akhasiatna bangcihleh daaituam theiding, cihte-a kipan aziak zong-a sepsuahna-pen azawi maan itna ahihi.
 
Minam itna azawi amaan theih nading-in atung-a akhial zawite zuui nawnlo-in, minam aphatuam sakthei thutheihna, thusinna pan-a pilna tuamtuamte paammaih salo-a minam sung-ah khahkhiatding, mimal' tung-ah kinga lo-a, thuguiletpi kician neihtheih nading, tua thugui-tawh kizuui-a sepsuah siam nading, kaal khat-zong akikhomlo kiimlehpaam' pumphat pakding ciang mapanna tepawl teello-a, hongki mudahphial zong-in thumaanthutak-ah dinkip ngam nading, itna pan-a aluangkhial khialhna pulaakna, khialhna kiphawkna, khialhna man' siamna-a kipan lungsim puakzia mahmah asiangtho asuah nading-a thaguipi ahi eimahmah' mapanna leh kivakna (talent) kitheihna-in minam-pen zawimaan tak-in hong itsak thei dinghi cih kei mimal' muhna ahihi.
 
Pulaaksa mahbang-in (Zomi bekbel hisaam kei-incin) biakna pawltuam (denomination) min khawng asihpihngam, tua pawltuam khatleh-khat zunko eekko-a kiko, ki-el, kineumuh kiniambawl tuamse cihte-a kipan kipawlna khatpeuh-a ki-elna khempeuh mimal tung-a kingak ziak bekbek ahihi. Tuabang mite-in agentehna-in biakna pawltuam ahihleh ama' pawlpi upna thuguipi taktakte leh ataangthu bulpite atheilotengteng hizawsop laai-hi. Tualsung leh minam kipawlna tuamtuamte-zong tuabangmah vive hi-a, mihing ahihkeileh tua kipawlna "min" peuh-tawh adiang phangphang vive ahihi. Hihte-pen din nading ahilopi-a ding ahihman-in "sehneel tung-a inn kilam" suak-a, apuukding vive ahihi. 
 
Ecclesiastes Laaigelhpa' cihbang-in Leitung-pen Dawimaangpa' Kumpigam ahihziak-hiambel theikhang-in tuhun seemseem ciang-in adiak-in Zomi boruak-ah thumaante kinawlkhiin-a, mizuau khatpen azuaupih ngam, apanpih ngam, asihpih ngam ama' khomkhop-in khang thei-a, phungcing veve lelmawk mah-hi. Thumaanthutak (the Truth) leh thumaanna (righteousness) omlo pipi-mah "thumanna (obedience)" anei ding-in kisawlsawl bilbel laailaai! Pasian-inlah amaanlote amang (obey) ding-a hongsawllah hilo! Lungdam nading, nopsak nading, lawhcin nading-mah cici veve. Ataktak-in, thumaanna omlo-a lawhcinnate, hauhna leh mihauhna-pen vokpi khat khamkhii-tawh akizeem-tawh kisuun-hi. Ecclesiastes Laaigelhpa-in, "Lungdam nading bekbek angaihsunsun mi-pen mihai ahihi. Mipilte-in sihna-tawh kisai ngaihsun-hi (7.4)" acihmah bang-in eileh-ei "ahai" ngiat ding-in kipantah thapaai, tua ziak-in norms and values akici sahkhua nuntaak khuasakzia-a gamtatluheek hoihte kikhangkhaan ngeilo, kibawlpha ngeilo, hoihlam manawh ngeilo pipi-mah "hoihlam amanawh litlit, akhangto keei" bang-in kisehseh laai-hi. Na-hi! 
 
Mimal leh angsung ahi "guunkuang khihna khau" phelkhia lopi-in minam I' it-a, azawi maanlo ahihman-in "minam itna"-pen "namdangte muhdahna"-in kiseh ngiau-hi. 
Minam itna-pen minampihte khenkhat elna-in kizangh-hi. 
Minam itna-pen ki-aakgual khenna-in kizangh-hi. 
Minam itna-pen sum meetbawlna-in kizangh-hi. 
Minam itna-pen tutphah zonna-in kizangh-hi. 
Minam itna-pen angsung minlehpuam zonna-in kizangh-hi.
Tua ahihleh Pasian itna eleh? Tuabangmah ahihi.
 
Tua ahih manin Itding, a zawi maan zuuiding; ngaiding, alampi maan tawnding; deihsakding, azia-om tak-a deihsakding! Tuabang ding-in Pasian-in thupha hongpia kimciat tahen!
 
 
By: Zokhai (Australia)

 


Comments




Leave a Reply