WWW.TUNGZANGNEWS.COM

 
Khapna Maw? Kamciamna? Kiciam Ngei Kei In! 

Khapna pen thamanh tawh kisai hi. Kamciamna pen Mangpau in “oath” kici hi. Thuciamna pen “vow” ci hi. Kiciamna le thuciamna pen a kibang khiatna nei ahi hi. Kiciam pen Mangpau in “swear” na ci hi. Kamciam, Thuciam le Kiciam hih thum teng a ki-unau abat hangin kiciam cih kammal pen a  hoih lo penpen kammal hi. Lai Siangtho in kiciam ding deih lo hi. Kamciam ding thuciam ding bel kumpi sem ding gam makai ding Pastor dingte le zumkong mangkong ah a thu le a hun tawh kisai in zatloh aphatmawhna om ding hi. Kikhapna le kiciamna pen miginalo mi zuaute nuntakna le kampauna bekah suak khia hi.

Bawlung kisuihna ah kuate in zo ding ci-in kikham kei un. Khapna ah kilangneihna, kimuhdahna, kihazatna, ki-elna kithahna dong piang tawntung hi. Khapna tawh nuntak ding hi lo hi. Kamciam tawh nuntak dinghi zaw hi. Lai Siangtho sungah Pasian in khapna tawh nasem ngei lo hi. Kamciamna tawh nasem bek hi. Abraham tungah a kamciam bangin Pasian in tung sak hi. Pasian in nang le kei adingin Jesuh Khrih ih up leh bek nuntak tawntungna ngah ding ci-in ong kamciam hi (John 14: 6,7). Pasian in “na tua cih leh, na tua cih zawh leh bek nuntak tawntungna kong pia ding hi” cih bangin khapna tawh ong kal lo hi. Pasian in kamciam in, a kiciam leh tangtung hi. Ahi zongin mihingte in hih Jesuh ong puak hun thak sungah kiciamna Swear cih thadah kamciamna Oath zat loh dingin ong hilh hi (Matt. 5: 33-37).

Kamciam piakna tawh thuciam pen thuneu lo ahi manin tuak khial lehang sihna hi (Gamlakvakna 30: 2). Jefthah in Pasian tungah ngah nading le zawh nading lametna tawh thuciamna a bawl vial manin bang tuak hiam cih  Thukhente 11: 30na pan na sim in. Kamciam thuciam khin lehang lauhuai mahmah a, ih tangtun sak loh phamawh hi. Na hehluat, na zawnluat, na lauluat, na deihluat, na it luat manin kam kiciam kha ngei kei in. Hih kamciamna/upna kamciam cihte pen kiupsak luatna tawh kizoma, ciam khin lehang lah kihtak huai galpi lian pen nawk loh phamawh khat hi ta ahi manin, makai tampi takte in mipi’ tung pan kamciamna a ngah theih nading un thu genin hilh mawk uh hi. Vangik guan uh hi. Sih le manh thaang siah ahi uh hi.

Hong piakhia ning ci a kamciam lel pen phadawm lai-a, ahi zongin Jesuh deih loh thuciam vow kamciam oath a cih pen hih bang ahi hi. “…Thuciamna in vantung na zang vet kei un…leitung zong na zang kei un…” ci-in ong hilh hi. Banghang hiam cih leh kamciam thuciam pen Israel te mahmah in zong a zat uh hangin Pasian mindaina le gim a thuak lawhna bek uh suak tawntung hi. “Topa a nuntak bangin” ci-in a kamciam uh hangin a zuaupi uh ahi hi, a ci hi (Jer. 5: 2). Topa aw nangmah tu-a kipan kong it ding uh hi ci-a, gen-ciam pen hoih lel a, ahi zongin tua banga ciam-gen se lo-in a it ih hih ding hi lel hi. Kamciam thuciam kiciam cihte pen a tamzaw khapna tawh kizom tawntung hi.  Kamciam thuciamna tawh “Topa aw tu-a kipan zu ka dawn nawn kei ding hi,” ciang hoih a, ahi zongin “Ka dawn lai tak mah leh hong zah kei in” ci-a zop pheina pen kiciamna suak tawntung ahi manin Topa Jesuh in “kuamah in kiciamna na zang kei zaw un” ci-in ong hilh ahi hi.

Ih Zolai Siangtho sungah, kamciam oath le kiciam swear cih kammalte kikhen diudeu lo-in kiciam cih kammal bekbek tawh zang khawm suk hi. A utna mun ah thuciam ci zel a utna mun ah kiciam ci zel hi. Manglai Siangtho sungah bel kician takin kikhen hi. Bangbang ahi zongin kamciam cih kammal pen kiciamna cih kammal tawh a deihna kibang dektak napi a gennopna a kilamdang mah ahi hi. Kamciam ahih kei leh thuciam zong a kici thei ciamna pen kiphatsakna, huaiham duhhopna le ngahnop zawhnop luat man bek thu tawh kizom a, kiciamna leuleu pen kisuanna le zuauthu tawh kizom hi. Tua hi a, kiciamna tawh tehna-in kamciam thuciam bawl pen thuzah in lauhuai lo a, a kul mahmah thu ah bawl theih zat theih ding hi napi-in tua nangawn zong ih Topa in zat loh dingin ong hilh zaw hi. Zat theih nading munte a nuai ah en ding hi hang.

Khaileh, sanggam, mite in kamciam a piak theih nadingin thaang a siahsiah lel thuhilh pa thugen nu na hi kha hiam? Ahih kei leh na kamciam thaang sungah hong ki-awk sak khin hiam? Kamciam Thuciam gen ding hilh ding zat ding kidawm in. Kiciamna ahih leh bel na khangtawnin zang vet kei in. “Mittaw a bang lam hilhte aw, note in gimna na thuak ding uh hi…” Matt. 23: 16-22na na sim in. Kiciamna na zat pahpahna in zuauphuak na hihna hong pholaak hi. Ei Christian thu-ummite pen sawmvei zavei kiciam pahpah kul lo-a khatvei kampau tawh hong ki-um thei ding mite ih hih kulzaw hi. Na kampau, na thugen hong ki-um hiam?

Kamciam ahi a, kiciamna ahi zongin zat ding hi lo a, kammal khat ih gen nak leh phazo hi. Upna tawh Pasian sungah a nungta eite’ adingin ahite “Hi”, ahilote “Hi lo” ih cihna ah Pasian tungah kamciam a piate  ih hi khin uh hi. Sanggamte aw, ahite “hi” ci un la, ahilote “hilo” na ci un.  “HI” le “HILO” pen thumaan adingin Pasian’ mai ah ih thuciamna hita hen! Tua khat bek pen ih gen theih ih piak theih kamciamna hi a, Jesuh’ nungzui thu-umte in kiciamna zat vet ding hi lo hi. Tua sangsikin a luhek a gamtatzia panin thuciam kamciam kiciam kul lo-in kam khat a pauna tawh hong ki-um thei dingte ih hih kul hizaw hi.

Na gen peuhpeuh ahi ahih leh “hi” ci in la, ahilo ahih leh, “hilo” cihna tawh kicingsak in. Tua bang hi lo-in kiciamna kam na zat ciangin Dawimangpa tawh kizomin thumanlo na hih lam tak hong kilang hi. Hamsa peuh mah lo hi. Kiciam kul lo hi. “Hi” maw? “Hilo”? Kei ka hih takmah leh si pah vang! Kei ka hih kei leh nang si ding cih kammalte in Dawimangpa’ ta na hihna kilang sak hi. Let your “yes” be yes and your “no” be no, so that you may not fall under condemnation.

Nang Pasian’ tungah na kamciam ding bang om hiam?  Om lo hi. Pasian in zong hih ih Topa Jesuh tungsiah bang ong kamciam ding om lai hiam? Om nawn lo hi. Kamciam hun thuciam hun kiciam hun beikhin zo a, up ding le muan ding hun hong tungkhin. Muan ding tawh kidim Pasian’ kammal Lai Siangtho le a laimu Jesuh Khrih le a Singlamteh hotkhiatnathu up ding bek cian lai hi. Tedim labu 321na ah hih bangin na gual hi:

1.      Khrih ka Kumpipa’ thuciamte ke’n muang ingh,

2.      A ki-pelh ngeilo thuciam-te ke’n muang ta’ng,

3.      Tu-in A thuciam-te muang in ka om a,

4.      Khrih ka Topa hong thuciamte ka muang a,

5.      A thuciamte muang peuh leng ka puk ngei kei,

Pasian in eite ong kham lo-in ong kamciam hi. Eite in kamciam ding ih nei kei a, Topa’ kamciam Topa’ thuciam ih up ih muan ding bek ahi hi.

Na tate sep ding sawl ding na neih ciangh kamciam ken. Kham ken. Kiciam sak ken. Mohphu tawh pantah se ken. Naupang khat bangmah thei lo-pi mohphu ong pia ning ci-in zawng khuaphawk lo khuaphawk sak a cih bangin Khap bawl se, kamciam se, kiciam sak se na hih manin lungsim maan lo, thumaan lo hong gen zaw ding uh a, thadahna le kiphatsakna-in hong nei ding uh hi. Kuang sawp in, Tui tawi in, na cih leh tui tawi hi lel hen. Kuang sawp hi lel hen. Ahite “hi” ahilote “hilo” a ci thei lel dingin pantah zaw in.  “Hi” le “Hilo” ah thumaan zo peuh lehang a dang kisam nawn lo hi. Amaante maan “hi” akhialte khial “hi”, ahite hi “hi”, ahilote “hilo” hi, ci ngam peuh lehang bang kisam nawn?


TZN: Suang Dal
 


Comments




Leave a Reply

    Tungzang News

    All