WWW.TUNGZANGNEWS.COM

 
Gam neucik Singapore in kum 20 sung bek in gam zawng (third world country) pan gam hau  (first world) suak man hi cih pen leitung khantohna thu a kan peuhmah in a theihsa ahi hi. A hang tampi om tuanlo a laipilna (education) hang bekbek mah ahi hi. A tup uh sang sak uh a,  a tangtunna dingin hanciam in thasaan uh hi. Kahlei khat a tun khit uh ciangin khawllo in a ban kahto kik uh a, a hoihzaw sem ding hanciam beh in mailam ah akimang ding pilna sinna te hahkat uh hi. Leitung gam khangto masate madawkna ahang kan in a sanginn uh laibu te behlap, puahpha cih bangin a hun zuiin kalsuan toto uh hi. Tua manin Singapore te sanginn ah a sin uh pilnate leitung gam khangto penpente laisimbu te tawh hong kikim ta hi.

A khantoh keei uh hangin pilna pen hanciam zawh man bek tawh hong pianglo a, sangkahna mun  ah laisim ding akigina leh a hoih teel kul ahi hi. Laisim ding a hoih tel dingin  thu thei mite kisam a, thu thei mahmah tampi a omna dingin pilna siamna a sang  mahmah a nei, a zo, a kahsa, a theisa kisam kik hi. Tua banga mipil misiam a  neihna ding uh in gamdangah a khangnote uh pilna sangzaw, siamna sangzaw,  theihna sangzaw sin dingin kumpi sum tampi bei in kisawlkhia uh a, hong tunkik  uh ciangin khasum kilawmtak tawh nasem sak in a pilna ngahte uh a gam khantohna  dingin zekkhiasak uh hi. Tua bang a pian theihna dingin sum leh pai a zeek  kumpite, theihna pilna a nei mipil misiamte, siamsinna phualpi ah sangsiate leh  a sin a kin sangnaupangte a pankhop siam mahmah uh kisam a, tua dingin a  tungnungpen kumpi lam pan hoihtak, siamtak in vaihawm, zeek uh hi. Anuai lam pan  a hoihzaw ding a thei peuhmah tunglamte in thupisim in genkhawm, gelkhawm pahpah  uh a, 'hi ei' a cih uh ciangin kalthak suan pahpah uh hi.

Naupang taleh makaih siamna a nei mite sanginn ah siapi sem dingin koih pahpah uh a,  siapi peuhmah in a seppih siate thalawpsak in naupangte in zong nuamsa uh a,  sanginn leh pilna sinna phualte mite in lunggulh vanvan uh hi. Sangnaupang  sungah a thanem deuhte amau sin theih ding ciang pilna sinna tuam neisak in  pattah uh a, nek a muhna ding uh khutsiamna hiam, nasep siamna hiam sinsak  hamtang uh hi. Gam khangto peuhmah ah nek leh dawn mipi in thupisak ahih manin  tua bang mun ah zong a sem siam dingin khangnote pattah uh hi. Minam tuamtuam om  hitaleh kideidan hetlo in semkhawm thei zen uh hi.

Institute of Technical Education (ITE) akici te pen gam tampi ah University te sangin a vanzat uh leh a pilna sinzia uh hoihzaw, siangthozaw, khangtozaw hi. Tuhun technology hoih penpen te tawh class room sungah pilna kisinsak uh a, khutsiamna  leh zatui bawl siamna cihte zong ahihna mun siangtho in cidam huai mahmah zen  hi!

Singapore ah pilna neihna pen lawhcinna bulpi hi cih thupisak penpen uh ahih manin mi khempeuh in pilna neihna ding hanciam uh hi. Asia gamsungah amau zaha pilna hanciam tamlo dinga, amau mai ah a khangto Japan leh Korea te tawh kikim dingin a hanciamna uh tangtung toto hi. Mihing khat pilna ngahna dingin kumpi sum tampi  beiin pattah uh a, sang sum peuhmah tawh kinawngkaisaklo, sum neihloh mana pilna  sin theilo cih peuhmah omsaklo hi. Kum 14 ciang peuhmah kumpi in a mawkna in  pilna pattah a, nekcingin a kisin ding uh a deihna ahi hi. ITE ah pilna sin  khempeuh za ah sawmkua in nasep gina mahmah ngah tek uh hi.

Hih ciang a tunna  dingin amau zong a mawk hanciam uh tawh a piang hisamlo a, a hun hun in kumpi  vaihawmsiamna leh mipil misiamte a zatsiam man uh ahi hi. Sum zong bei ngam,  laibu zong puahpha ngam, a hoih a thak peuhmah kisin ngam, bawh ngam mawk uh hi.  Tua lak pan hon khat en suk lai leng:

1. A pil  asiam peuhmah pattah pah: Naupang a  neu tung pan a pil, a navak, a  siam mahmah dingte sanginn pan in tengkhia pahpah uh a, amau lungsim picinna leh  khuak hatna tawh kizui in a lawmte uh sangin a sangzaw pilna leh siamna tawh  pattah pah uh hi. Nasep zonna leh nasepna ah zong tua banga a pilzaw diak, a  siamzaw diakte lamto mengmeng in makaisak uh a, gamleh minam in phattuampih pah  hi. Tua manin gamdang mi ahi phial zongin a pil ding a siam ding peuhmah a gam  vuah sem dingin deih mahmah uh a, kuamah deidanlo uh hi.

2. Gelkholhna nei, Makaih siamna neite mite tawh kidem dingin tawsawn pah:  Gamsung khantohna dingin khangno lak pan gelkholh siamna nei, makaih siamna nei  peuhmah leitung tawh kidem zo dingin tawsawn uh a, lamto pah uh hi. Gam khangto  a mipil misiamte tawh kikhawlsak in, pilna siamna a sinkhop theih nadingin  sawlkhia uh hi. Tua banga a va kuankhiatna uh pan a theih thute uh inn ah  kikupnawina, genkhopna, phattuampih theih ding khempeuh genkhopna nei hamtang uh  hi. Tua panin mite theihsiam dingin bangci hawmsawn ding cih ngaihsun uh a, a  manlang thei pena khangthakte in a sin theih ding un hanciampih uh hi. Tua manin  leitung kiu khata thupiang peuhmah a gamsung vuah theihna dingin Siapi, research  scholar, sangsia te leh pilna a sin laitakte in nakpi in hanciam uh hi. Maths,  Science, technical education, leh language te hoihtaka a sinsak theihna dingin  sangsiate training hoihtak pia masa hamtang uh hi. Sia khat in a hilh thu  peuhmah a tel mahmah ding deih masa hamtang uh hi. Sangsia peuhmah a siamna a  khanna dingin training neisak den uh a, a kisap khempeuh zong vaihawmsak uh hi.  Leitung ah a level sangpen te tawh kikim in laihilhsak uh hi.

3. Mawhpuakna liansak mahmah uh hi: Khantohna a deih mah bang un a khangtosak thei dingte nakpi in pattah uh a, a zeek siam dingte zong nakpitakin pattah uh hi. A siam, a thei peuhmah kipahtawi in khasum nangawn a siamna tawh kizui in midangte sangin tamsak zaw pah ngam uh hi. Tua banga a kisemsak peuhmah  in zong a sum ngahzah tawh kituak in kumkhat in bangtan tup ding, kumkhat in  bangzah semkhia ding, bangciang hanciam ding cih ciangtanna leh ngimna kician  mahmah laikung laidal tawh geelsa in nei dimdiam uh hi. Tua bang a lak theite  bek mah kithupi bawl pah diak hi. Sangnaupang te a pattah siam dan, laihilh a  siam dan, kim leh pam tawh a kizopna, a seppih lawm leh gual tawh a  kikholhsiamna cihte limtak in kithupisak lai hi. Gam khangto dang tampi ah  tuazaha kisittelna, ki-etcikna omlo a, na mawhpuakna na zawh leh zawhloh nakpi a  hong kisit cih bang tamlua lo hi.

Singapore zong tua zah in a khantoh veva hangin gam khangto dang tampi a phaklohna om lai veve hi. Laibu leh pilna sinna a hoih mahmah hang, mite a pattah siam mahmah uh hang,  amau zong na bukim tuanlo uh hi.

a). Mimal pianpih  pilna leh siamna kitamzatlo: Mihing khempeuh in i pianpih pilna leh siamna i nei  hi. Tua pen sanginn pan i sin tawm, laibu pan i sim tawm hi hetlo ahi hi.  Singapore ah sanginn hoih in mite in a lai simbu uh a lum a let in thei mahmah  uh a, sangsia te sinsak zong hoih in kicing mahmah hi. Kicinglua liang, a kisap  khempeuh uh kipia lua liang leuleu ahih manin sangnaupang te in amau pianpih  pilna leh ciimna, ngaihsut siamna cihte a zatna ding uh hun om manlo hi kici hi.  Ahang pen 'laibu ah kigelh banga sin ding, theih ding, siam ding' cih ahih man  hi. Tua manin gam khangto khinsa mah ahi Finland te tawh a teh uh ciang hua gama  te in mihing pianpih lungsim leh khuak zatna lamah nakpi in madawkzaw hi cih  mukhia uh hi. Tung lam pan a kihilh khempeuh bek a siam mahmah sangnaupangte pen  leitungah sangnaupang lawhcing pente na hi hetlo hi cih kitheita hi.

b). Kizop, kikholhsiamna ban ah sepkhawm siamna kisin kul: Laibu sunga pilna leh siamna om khempeuh i theih khit bek hun lo a, midangte tawh kizop, kikholh siamna leh sepkhawm siamna te khantohna picing neihna dingin kisam hamtang hi. Mi tawh a kizom theilo a kikhawl theilo, a semkhawm theilo te a pil mahmah zongin tuikulh bangin etlawm mahmah bek a, tenna ding taktak in zat theihloh hi. Tua ahih manin  minam tuamtuam tawh a semkhawm thei hiam, biakna tuamtuam tawh a kikhawl thei  hiam, deihna leh ngaihsutna kibanglo minam lak ah zong na a sem thei hiam cihte  sanginn pua lam ah nasep ciang hong kisam pha mahmahta hi. Sia hoih leh laibu  hoih bek hilo in, mi hoih a piangsak sanginn leh gam pen hong thupi deuhdeuh hi  cih, leitung globalizationhuih in hong nawk toh zelna ah kitel semsem  hi.

c). Tuition ah sum tampi bei hangin pilna kibehlap tuanlo hi: Nu leh pa tampi in a tate pil ding a deihsak luat manin hun-awng nangawn neisaklo liangin tuition ah kahsak in  a hun uh bingsak hi. Tua banga hih luatna in naupangte pilsak tuam tuanlo hi
cih  Denmark leh Finland gamte sangkahzia pan kithei hi. Tua gamte ah naupangte in  sanginn ah sin ban vuah tuition tampi kah kawikawi cih bang omlo in amau leh amau a kisintawmna dingin hun-awng leh hunpha bawlsak zaw uh hi. Lawm leh gual tawh kikholhna hun tamsak, amau leh amau a kisin tawmna dingin laibu bekbek a kam vuah tahlo uh hi.

Thukhupna: Mihing in tawlnga hit-hiat a  lungsim ciim tak tawh thu i ngaihsut, na i sep pen pilna siamna a kibehlapna bulpi khat na hi bilbel hi. Tua manin sakol tui duhlo tui dawnsak sawm teitei banga sangnaupang utlopipi sangkah a i sawl, tuition ah i kahsak pen a phattuampih uh tam khollo hi. Mihing in ei leh ei kisinna pan pilna leh siamna taktak kingahzaw a, hanciamna leh hahkatna tawh i ngaihsutna ciang kitung pan hi. Tungsiah pan kisinsak siamna leh kihilh siamna bek tawh pilna siamna te kicinglo a, laibu sung ciang bek theihna hithei hi. Laibu sungah a kigelh nailo thuthak, lathak te tampi a ngaihsunkhia thei dingin suakta tak, tawldam tak a ngaihsut hit-hiat a kul hun zong om cihna hi.

Mite khantohna pan Zomi te in zong i sin ding, i theih ding, i phawk ding tampi om hi in ka ciamteh hi. Laibu sunga kigelh teng bek theihna tawh pilna kicinglo a; a kigelhnailo, a kithei nailo ahi zongin hong piang ding, mailam thute muhkholh theihna tawh ngaihsut siamna te i neih ding a thupi penpen hi. Laibu lui pen leh laibu thak pen sungah kigelhte i theih ban ah a kigelh nailo laibu sungah bang hong kigelh ding cih zong ngaihsut kholhna mitkha tawh mu khol in kalsuan ciat ni.

Pilna bek mah tawh i khantohna hong bucing ding hi.

By: Dr. Hau Za Cin

 
 


Comments




Leave a Reply

    Tungzang News

    All