WWW.TUNGZANGNEWS.COM

 
Sum kitahna le Lai Thaikapna Khristian te'n hih huai maw/ hih huai lo ?

Zomi U.S tungte lak ah zan khat thu a millionaire hih theih na lampi pen state lotto (thi-thu) ding bek om hi, cih a ngaihsun pawl khat om hi. Pasian in hih lotto hih pen Zomi te hauh theih na ding lam hong hon sak hi, ci-in upna leh lam-et na tawh a hun ngah sim,a sum neih zahzah tawh lotto (thi laidal) lei den hi. tua ban ah adang sumtah leh laithaikap kimawl na tuamtuam te zong hih den hi. Lai thai akap ciang bangin ngah thei lai dep ahih man alawm dang te zong ahih ding tha a piak beh zaw zek lai hi.

Ka home cell uh ah mikhat in, “lotto ka ngah leh na Pasian nasep na ding uh nakpi kong huh ding hi, hong ci hi. Ken zong, “lotto ngah a, million khat nong piak ding sangin na 1/10 manman in biak inn ah khia zaw le the thupha ngah baih zaw ni teh, Malakhi Laisiangtho in ci veh aw, ci’n ka dawng kik hi.

Lai siangtho in laithai kapna, sum kitahna te pen milim biakna nam khat in na gen hi. Pasian munah milim koih pen ahehna piang sak hi. Keimah in a haza Pasian ka hihi, ci hi. Hi bang nam milim te pen Satan in Khristian te thang hong siahna ahihi. “Khristian ten milim mai ah kuun nop kei leh milim dang ka bia sak teitei ding,” cih angaihsut leh thang siahna ahihi. I hauh nop taktak leh Dawimangpa bia in va lungkim sak leeng, hauhna hong pia thei hi. “Kei hong bia le cin, hih leitung hauhna, minthanna, vangneihna, kong pia ding hi,’ ci-in Topa Jesu na ngawn na zia et hi. “Dawi leh kha niin te in milim biate tungah vangliatna pia tak pi hi. Satan in a khemkhem nalam dang bawl theihna leh hauhna pia thei hi. (Life in the Spirit Study Bible, the nature of Idols, P. 403)

Khristian te sungah a man lo hauhnopna hong bang ci om hiam?

1. Khemna pan hong piang hi: Khemna a tuamtuam in hong lut thei hi. Minthan nopna pan aman lo sum deihna hong lut hi. Sum nei leeng na khemepuh kisem thei hi, lawm ki nei, midang te ki huh zo, mizawng te ki huh zo, Pasian nasepna nak pi kisem thei, cih te hong lut hi. Ahoih vive hi na pi, lang-dik (half truth) vive ahihi. Dawimangpan nian kawi pen half truth ahi hi. Lai Siangtho kammal teek mah zang a, khemna ahihi.

2. America ah prosperity gospel a cih khat laang mahmah a, tua in mite khemna sung tun hi. TV pan thugen pawl khatin, ‘kei nasepna ah khaici hong tuh le cin, … na hau ding hi, cih zang mahmah uh hi. Pawlkhat in hauhnopna tawh sum na pia takpi a, amau cih bang angah kik loh uh ciang tazasuai (lawsuit ) lai uh hi.

3. Zawnna pen Pasian hamsiatna hi-a, hauhna pen Pasian thupha hi, cih thuhilhna hang ahi hi. Pharisai te in Jesu thugen te a san zawh loh na pen, ‘ Jesu in, inn leh lo nei lo, mizawng khat ahih man a thugen te man theilo ding hi,’ cih ngaihsutna nei uh hi.

4. Hauhna pen Pasian in hong pia thei lua hi. ahi zongin laithai kapna, lotto hihna zankhat thu a hauhna te Pasian hong kamciam hauhna hi lo hi. Pasian deih pen, “eima khut tawh nasepna leh geel siamna pan hauhna” ahihi. Paunak 8 sungah, “Keimah in piak khiat theih na ding hauhna leh min phatna ka nei hi,” ci hi. Pasian kihtakna in pilna, hauhna bulpi ahihi. Solomon in, “mi pawlkhat in nasep hahkat mahmah napi Pasian kihta lo ahih man in, asep sa te Pasian lungkim sak mita ding kikoih sak, ci hi. Solomon in milim bia kha ahih man in, ahauhna leh minthanna te ama’ khangbek khom a, a tapa khang ah bei hi.

5. Pawllu in, “sum hauhnopna in khialna pawl khempeuh I bulpi ahihi, ci hi. (I tim 6:10), .. kipha sakin sawtpi kimang lo ding hih leitungah a upna uh akoih loh ding sum hau mite gen in (aneu17). Sum deih luatna pan ki kem in, na ngahzah sum tawh lungkim in…Pasian in kong paisan ngei kei ding,” ci hi. (Heb 13:5)

6. Jesun khat vei beek zong a khut sungah sum koih ngeilo hi. Biakinn phiangsiah piak ding ciangin Peter sawl a, ngasa kam sung sawk sak hi. Banghang hiam cih leh, hih leitungah a ma gam lamh sawm lo hi.

7.Mizawng te huhna, Pasian gam ading piak khiatna te, tontung ading khol na hi hi. “Pawl in, ka uppa ka tel a, amah muanhuai hi; ama’ tung ka piak khempeuh nitwp ni dong in kem zo ding cih ka um hi,’ ci hi.

Lotto ngahte teci panna:

‘Lotto Million ka ngah ni pan ki pan ka nupa kizopna uh sia hi’. ( ). ‘Ka ih mu thei kei a, ka lau den hi.’ ( ) ‘Na sem nonlo ka hih man ka cim lua a, ka lung kham hi.’ ‘Ka ngahma sang piak khiatna ka kiam zaw hi; ahang pen sum thakhatthu a bei thei ahih na ka phawk hi.’ ‘Million ka ngah khit the lungnopna sum tungah omlo ahih lam ka tel hi.’ ‘Hau leng Pasian a ding tampi ka pia khia ding aci te cik mah in ahauh lam ka mu kei a, a ngahzah tung tawn a, man tak apia khia te mihau ahihna ka phawk hi.’

Tua ahih leh bang ci ih ngaihsut hiam? Half truth tawh kalsuan ding I hiam? Pasian kammal tawh kalsuan ding ih hiam? Pasian biakna sungah lungkimna in hauhna lianpi (lungsim damna, pumpi damna, hong tungding khang ah lung muanna) piang sak hi. Milim biakna pan khawl sawm ta ni.

Laisim mimal Pasian in thupha hong pia hen.

Rev. John Thang Hum

International Tongsan Consultant, Taxas,USA
 


Comments




Leave a Reply